1
ایلدیریم کانادا نی قاشیقینان آچار
پاققیلدار قاپاقی گئدر دهیر سقفه سلطنت ساواشار. سلطنتین ایکی دانا قیزیل دیشی
وار. من قورخاندا سلطنت قره خکندازی قیزدیرار قورخولوغومو گوتورر...
گؤزلریمی یومارام ناردرن چادیراسین
چکر اوستومه بیر قاشیق دوز تؤکر بیر ایستکان سودا چالخالار سپهلر خکندازین
اوستونه چیسیلدار...
هرنهیه اوخشاسا سلطنت دئیر اوندان
قورخموسان...
ـ ایته اوخوشور
ـ یوخ بابا... قره پیشیک دی
ایلدیریم بادی توفنگ آلیب قره پیشیکی
ویرسین...
ـ ویرما سنآللاه... حئیوان دی.
ـ گوناه دی. ایشین اولماسین. قره پیشیک
سئیید اولار.
قره پیشیک قرهآغقویروغی یئییبدی. قوشلارین
هرهسینین بیر آدی وار...
ایاخلی... دیمدیکلی... قرهآغقویروق...
ایلدیریم ایاخلینی اوش یول ساتیب گئنهده
قئییدیب. نصیر دئییر دولت قوشلاری توتور. ایکی یول قوش یوواسینی اوچوردوب
ایلدیریم تازادان دوزلدیب.
2
ائو شختهخانادی. شؤشهلر دونوب حیط
گؤرسنمیر. اوتوموشام سویوق اوتاقدا خطلریمی یازیرام. عاباسقولی دوواردا عکسدن
اهییلیب باخیری. آز قالیر قوپسون دوشسون یئره. من باخاندا گولور اکرم گلنده
میجسمه کیمین اؤزون توتور. بو حیط زیناقولودان یئتیشیب عاباسقولویا.
ایلدیریم حیطده قاردانآدام دوزلدیب.
حیطین شیری دونوبدی. اکرم گئجهدن دهلیزده میس آفتاهادا سو قویوب. تامارا آمباردا
دولچا قویوب دای موستراحا گئتمیر.
نورالدین مورخصییه گلیب. قره
پوتونلاری آستانادا دی. دابانلاری چاتدیییبدی. اوتوروب پیللهده سلطنت پیی
ویریر.
ایکیمئتیر قار یاغیب. مدرسهمیز
دونیانین اوباشیندا. دای اوشاقلاردان قورخمورام. دای هئشکس منی ویرا بیلمز.
نورالدین یاپیشیب الیمدن. دستمالچیلار دیککینده ایاغی زویور ییخیلیر. منده
ییخیلیرام. قهرمانیم گوپبولتینن بولوت لاردان توشور یئره. اکرمین ناغیلی
یادیما دوشور... قاری ننه بوزدا ایاغی زویور ییخیلیر...
قاریننه دئدی بوز سن نه ظالیم ایمیشسن؟
بوز دئدی... من ظالیم اولسا ایدیم گون منی اریتمز ایدی. قاریننه دئدی گون سن نه
ظالیم ایمیشسن؟ گون دئدی... من ظالیم اولسا ایدیم بولوت منیم قاباغیمی کسمز ایدی.
قاریننه دئدی بولوت سن نه ظالیم ایمیشسن؟ بولوت دئدی من ظالیم اولسا ایدیم یاغیش
مندن یاغماز ایدی...
3
نورالدین سردشتدن منه جنگی هواپیما
گتیریبدی. دؤرت دانا قلمی باطری یئییر. یحیا دئییر افـچهارده دی. اکرمه
بولوز دامن گتیریب. سلطنته قرهقیرمیزی چرقد، تامارایا ایپ جوراب، ناردرنه بیر جوت
گوشوارا، ایلدیریما سئیکو ساعات، نصیره ده نارینجی گوندارا.
ساعات آخشام بئش دی. مچیدین بولندگوسی
با نوایکاروان سالیب. یحیی بیردانا اؤزونه تیتاب آلیب بیردانادا منه. اوتوموشوخ
مشکریمعمیگیلین دربندینین پیللهلرینده...
دوواردا بنیصدرین عکسینی چکیبلر
سورادا قرهلیییبلر. مشاحدباققال اوتوروب توکانین سککیسینده. مچیدین قاباغیندا
اوشاقلار آشیق اوینوری. صفورهنین بالا اوغلی منتش سورور آغزیننده سیگینال
چالیر. نورالدین نامهده یازیب کی سردشتدن وئریبلر تیکابا. ایلدیریم مشاحددن
منه کیتکت آلیب الیمآغزیم ککو اولوب یحیی نهقدر باخیر وئرمیرم.
بو دربندین دیبی عاباسقولیحیطی دی.
نورالدین آدینی میخچکیشینن عاباسقولیحیطینین داشلارینین بیرینین اوستونده
یازیبدی. عاباسقولی اؤلنده ایکی برنی گوموشپولی وار ایدی. بیرین بمبلآلما
آغاجینین آلتیندا گیزلتمیشدی بیرینده توتآغاجینین. نورالدین هله فوتکاغاذینی
ساخلیییبدی...
عباسقلی دباغ... ساکن تبریز کوی
باغمیشه محله دالی کوچه... تاریخ تولد 1290 شمسی. تاریخ فوت 1329. نام پدر زنا قلی
(زیناقولی)... نام مادر تامارا...
4
زیناقولی ستارخانآتچیسی ایدی. کلنتر
ائوینده ایشلردی. دلیسو بیر کیشی ایدی. مشروطهده نارینجک آتاردی. هوکماوار
جنگینده قیچینا گوللـه دهیمیشدی...
مشروطه بوتون شهرلردن اوزولوب بیر
تبریز قالمیشدی. تبریز نئچه آی ایدی موحاصیرهده ایدی. مردوم آجلیقدان اوتعلف یئییردیلر.
محمدعلیشاه، رحیمخانی یوللامیشدی قرهداغلشکرینن گلمیشدی اوتوموشدی تبریزین
اورتاسیندا باغشومالین یوخاری باشیندا قلیان چکیردی. روس سفیری باقیرخانا دئمیشدی
توفنگین یئره قویسون قان تؤکولمهسین. موجاهیدلر امیرهقیز محلهسینده ستارخانین
ائوینده دؤرتدؤره القولتوق اوتوموشدولار... زیناقولی توفنگین تمیزلیردی
گؤزونون آلتینان باخیردی ستارخانا...
ستارخان بؤرکون گؤتدی الین چکدی باشینا
گینه بؤرکون قویدی باشینا. زیناقولونون الی دهیدی گوللـه آچیلدی دهیدی سقفه
کمانه ائلهدی دهیدی طاقچاداکی لالهچیراغلارین بیری سیندی... هئشکسه آمما هئشزاد
اولمادی. ستارخان بونی خوش یومنه توتدی صاباحیسی ویردی اوزاقدان روس بایراقین
یئره سالدی مردوم یاشاسین ستارخان سسلهدی خبرلر یئتیشدی باقیرخانا. باقیرخان
خیاوان محلهسینین موجاهیدلرینن حمله ائلهدی باغشومالا رحیمخان قاچدی.
خبرلر یئتیشدی او بیری شهرلره مشروطهچیلری
شور توتدی تؤکولدولر تهرانی آلدیلار محمدعلیشاه روسیه سیفارتینه پناهنده اولدی.
تبریزده آمما مشروطه جشنی یاسا دؤندو...
کوچهلر دولموشدی سالداتلارینان. روس
قوشونی آرازدان گئچیب تبریزی ایشغال ائلهمیشدی. اوروسلار سگگیز ایل تبریزده
قالدیلار...
5
بیرگون ایکیدانا سالدات بیر قافقازلی
قیزی چایقیراغیندا قووالیردی زیناقولی یئتیشمیشدی ویرمیشدی ایکیسینده سالمیشدی
اسبهریزه قیزی قاچیتمیشدی ائولرینه. قیزین آدی تامارا ایدی.
تامارانین دده ننهسین روسیه اینقیلابیندا
تئزارلار قافقازدا اؤلدورموشدی. 1284ینجی شمسی ایلده تامارا ستارخان عشقینه
مشروطه عشقینه آرازدان گئچیب تبریزه گلمیشدی.
زیناقولی اوش تومن باهالیغیندا
اؤلموشدی. هله عاباسقولی تامارانین قارنیندا ایدی. مردوم آجلیغدان
ایت پیشیکی پیشیریردیلر یئییردیلر. سیچاندان قارقادان ائششکدنده موضاییقه ائلهمیردیلر.
آراکوچهده بیر نفر چورک الینده گلیردی ویرمیشدیلار باشیندان چورهکین آلیب قاچمیشدیلار.
بیرینجیجنگجهانی قورتولا قورتولدا ایدی. روس قوشونی اینگیلیس قوشونی بوغدالارین
هامیسینی بیریئرده پول وئریب آلمیشدی بوغدانین کیلوسی اوش تومنه یئتیشمیشدی. اوشاقلارین
دریلری یاپیشمیشدی سوموکلرینه زیبیللیقلاردا ائشینیردیلر بیرزاد
تاپمیردیلار. خزلکیمی کوچهلرده اؤلولر تؤکولموشدی گؤتورن یوخودی. ننهلر کورپهلرین
کوچهده قویوردولار گئدیردیلر. عاباسقولی آمما اؤلمهمیشدی. زیناقولودان ایکیدانا
الچهلیق گیلانارلیق قالمیشدی تامارا ساتمیشدی عاباسقولونی بؤیوتموشدی.
6
عاباسقولی بیر ونیارلی قیز آلمیشدی
آدی آسیه ایدی. آسیهنین اوشاغی اولمازدی بوشامیشدی سلطنتی آلمیشدی. سلطنت
گولموراد نوهسی ایدی. ددهسی اؤلموشدی ننهسی گئتمیشدی آیری کیشییه. گولمورادگیلده
قالاردی. نورالدین اولاندا عاباسقولی دلیکیمی حیطده اوینوردی. تامارا پنجرهدن
باخیردی گولوردی.
عاباسقولی سیاواندا دباغخانادا
ایشلردی. پیشهوری زمانی شهنازین آخیرینده یئکه گؤن کرخاناسی ویرمیشدیلار دباغلار
بئکار قالمیشدی عاباسقولی گئتمیشدی کیربیت کرخاناسیندا ایشلهمیشدی. بیر گون
کرخانادان گلمیشدی باشین دایامیشدی دووارا سلطنت سو گتیرینجن گؤزلرین یومموشدی
دای آشمامیشدی. هله نورالدین اوچ یاشیندا ایدی. تامارانین باشینا غوصهدن هاوا
گلمیشدی.
تامارا یاپیشاردی نورالدینین الیندن
گئدهردیلر دستمالچیلار باغینا. حمزهعلی بیر سله میوه وئرهردی گتیرهردیلر.
تامارانین اوشدانا بیلهزیکی وار ایدی بیر بیر اکرمه شهنازا گؤرسهدردی...
ـ بو شاه خیاوانی دی. بو مارالان یولو
دی... بودا اهر یولودی...
کوچهده اوشاقلار توشردی تامارانین
دالیسیجان...
ـ تامارا قوت... گل منی توت
تامارا داش آتاردی اوشاقلار قاچاردی.
7
بیر گون سلطنت گئتمیشدی بوروخبوروخدربنده
نصیر ـگوهرین اریـ گؤرموشدی سؤیموشدی ائلچی یوللامیشدی سلطنت یوخ دئمیشدی.
نالی قویموشدولار اوتا نئینهمیشدیلر سلطنت هاوالانمیشدی هن دئمیشدی. ایلدیریمینان
ناردرن اولموشدی.
نصیر گلمیشدی عاباسقولی حیطینده
قالیردی. بیر گون ایسماعیل ـگوهرین اوغلیـ پیچاقی گؤتورموشدی کی...
ـ گئدیرم سلطنتی اؤلدورم. نصیری بیزدن
ائلیییبدی.
گوهر آندا وئرمیشدی قویمامیشدی.
سلطنت نورالدینی قویموشدی باشماخچی
یانینا. نئچه گون گئتمیشدی دای گئتمهمیشدی کی...
ـ اوردا پیس سوزلر دانیشیرلار.
سلطنت تانیش تاپمیشدی یازدیرمیشدی
ارتئشه. یوللامیشدیلار پسوهیه.
نورالدین ائولندیرمهلی اولموشدی. سلطنت چادیراسین
اؤتموشدی گولدستهنین بالا قیزی اکرمه ائلچی گئتمیشدی.
8
گولدسته سلطنتین داییقیزیسی ایدی.
نئچه ایل قاباق اؤلموشدی. ائولری شورچومنده ایدی. اوچ قیزی ایکی اوغلی وار
ایدی... طرلان، هاشیم، شهناز، اکرم، مقصود.
اکرم اوندا ننهلیقی زیورینن ساواشمیشدی
گئتمیشدی تهراندا باجیسی طرلانگیله. اوردا خیاطلیقا گئدیردی.
طرلانین اوشاغی اولمازدی. حیدرعلی ـ
طرلانین اری ـ گئجهلر بازاردا پارچا توخویاردی گونوزلر گلردی ائوده یاتاردی.
مولویده موستاجیر ایدیلر...
سگگیز مئتیر اوتاق ایدی ایکی مئتیر
گیلیم، پنجره ایچینده بالاجا بیر پولهته اوستونده بیر قابلاما. باغمئشهدن
تهرانا یولو دوشهن گئدردی اوردا قالاردی. حیطده بیر حو,ض وار ایدی همی پالتار
یوواردیلار همی قابقاشیق همی دستماز آلاردیلار همیده آفتاهادا سو دولدوراردیلار
آپاراردیلار موستراحا. عیفتخانیم موستراحین دامینیدا بیردانا موعتادا ایجارهیه
وئرمیشدی. طرلان اؤرگشمیشدی باغمئشهده چئشمهده پالتار یوماغا عیفتخانیم
ساواشاردیکی سو پولو چوخ گلر. هاشیمدا گئجهلر گلردی. ارتئشدن قاچمیشدی گلمیشدی
لالهزاردا باشماخ تیکیردی.
زنگ ویرمیشدیلار اکرم گئتمیشدی تبریزه
نورالدین گؤرموشدی بینمیشدی. سگگیز آی نیشانلی قالمیشدیلار...
9
نورالدین اوتاناردی شورچومنده حمزهعلیگیلین
ائوینین قاباغیندان گئچسین گئدردی کلنتر محلهسیندن گلردی دالیکوچهده
ائولرینه.
اکرمین جاهازین خونچادا باشلاریندا
آپارمیشدیلار عاباسقولوگیله. طرلاندا گئتمیشدی. جعفر ـچیراغعلینین ددهسیـ
اؤلموشدی شهناز گلنمهمیشدی. اوندا اوست حاجهاشیم حیطینده اولاردیلار.
نورالدینی پسوهدن وئرمیشدیلر ساققیزا.
گئتمیشدی ساققیزدا ائو توتا گله اکرمی آپارا. ایکی هفته چکمیشدی گلینجن.
ساققیزین یولی قورخمالی ایدی. نصیر
قویمامیشدی سلطنت گلسین. ناردرن آمما اوتوموشدی اکرمین قوجاغیندا گلمیشدی.
نورالدین یئتیشمهمیش یوللامیشدیلار ماهابادا ماموریته... جاهازی تؤکموشدی ائوین
وسطینه گئتمیشدی اکرم قرانلیقدا هئشزاد تاپمامیشدی یاندیرسین. همسایانین کیشیسی
شمع گتیرمیشدی. موستراح آت طبقهده ایدی گئجهلر اکرم قورخاردی گئده ائوده دولچا
قویموشدی سحر آپاراردی بوشالداردی....
10
اوندا هله سونوگرافی یوخودی. نئچه آی
گئچمیشدی هله من بیلمیردیم اوغلانام یا قیزام. نئچه دانا کوروموزوم ایدیم
قاریشمیشدیم بیربیرینه آللاه بیلیردی نمنه اولاجاغام...
من اولاندا گلمیشدیق تبریزه.
جوماخشامی ایدی. بایرامین ایکینجی آیی. 1354. ناهاردان سورا ساعات اوش یاریم...
خانیم دوهتور بندیمی کسدی یاپیشدی
ایاخلاریمدان ایکی دانا چالدی کورهکیمدن چیغیردیم. قیزلار قورولادیلار پوکدولر
پتویا قویدولار میزین اوستونه. اکرمین آدین یازمیشدیلار قولوما ایتمهیم. صاباحیسی
مقصود گلدی تاکسینان آپاردی عاباسقولوگیله. سلطنت دربندین باشیندا گؤزلوردی.
تهراندان طرلان گلمیشدی. زیناقولونون بویوکددهسینین آدی غضنفر ایدی منیمده
آدیمی قویدولار غضنفر.
عاباسقولوگیلده قارنیم سانجیلانمیشدی
سلطنت بیر قاشیق ساری یاغ وئرمیشدی سسیم باتمیشدی. اکرم اوتوموشدی باشیم اوسته
آغلیردی. سلطنت گئتمیشدی صفورهنی گتیرمیشدی آنلیما ضاماد قویموشدی. حمزهعلی
گیلده گؤبهکیم توشموشدی شهنازینان طرلان آپارمیشدیلار چارراه عباسیدا حاجایماموئردی
حامامیندا یویوندورموشدولار آپارمیشدیلار راستاکوچهده کسدیرمیشدیلر. لوللهمیشدیم
دوهتورون اوستونه. ایکیهفتهلیق ایدیم نورالدین گلمیشدی آپارمیشدی ساققیزا.
11
ساققیزدا اکرم منی قویاردی چیغیرا
چیغیرا گئدردی حیطده اسکیلریمی یوواردی منده حیرصیمدن سوت اممزیدیم. گئتمیشدیلر
قوریسوت آلمیشدی لار. اکرم توخونما توخویاردی یون چیرپاردی یورقان دؤشک توتاردی. بیر یول توخونما
میلینن قولاغین قورتدوردی ویرمیشیدیم میل گیرمیشدی قولاغینین پردهسی ییرتیلمیشدی.
بیر عکسیم وار هله بیر یاشیم اولمویوب حمزهعلی لبهدارین قویوب باشیما...
دستمالچیباغینی ساتمیشدیلار حمزهعلی
بیر کناره آلمیشدی گلمیشدی ساققیزا. یئل لبهدارین آپارمیشدی قاچمیشدی توتسون
شوفئر دئمیشدیبس قاچیر پول وئرمهسین قووالامیشدی.
ساققیزدان گئتمیشدیق مریوانا.
ائویمیزین قاباغیندا بیر نفت بوشکاسی وار ایدی دئمیشدیمبس سودو ایشمیشدیم. بیر
یخچل آلمیشدیق دوققوز یوز تومنه. بیر تخته کومودلی تیلویزیون. بیر قره آیوا ضبط.
بو ضبطدن شهنازگیلین ده وار ایدی. چیراغعلی ـشهنازین اریـ ارتئشی ایدی
وئرمیشدیلر سنندجه. تبریزدن گئدردیق گئجه سنندج ده قالاردیق سحر مینردیق ساققیز
ماشینلارینا. عاباس چاهاروم اوخوردی نازلی دوّم یحیی دا اوّل.
مریواندان گئتدیق مرنده زریخانیمگیله.
کوچهمیز اوز اشاغی ایدی ایکیدانا بالا قیز گلردی دالدان سهچرخهمی ایتلردی
قاچاردی. اکرم دئمیشدی آللاه قولاغیما ایپ باغلیییب گؤیدن سالیب دوشموشم زریخانیمگیله
منده اینانمیشدیم. بیز حیطین بوباشیندا اوتوراردیق زری خانیم گیل اوباشیندا. اکرم
دئیردی آلمانین پولوشویون یئره آتسان زریخانیم ساواشار. ناهارچاغیدا قویمازدی
کوچهیه چیخام...
ـ جویوت گلر توتار آپارار باشی وی کسه
ر قانی وی ساتار.
بیریول اکرم تیلویزیوندا قورخمالی فیلمه
باخیردی منده آستانادا اوینوردوم دمپایانین ایچینده بیر دانا سوسری گؤرموشدوم
سسلهمیشدیم...
ـ مامان بو کیمدی؟
باغری چاتدامیشدی.
12
نورالدینی یوللامیشدیلار تبریزه.
خیاواندان توپ توفنگ سسی گلیردی من قورخوردوم. اکرمین الین قویموشدوم اورهییمه
چوبالاماسین. کوچهده مرگبرشاه دئییردیلر من دئییردیم بس مرجیمهشاه دئییرلر.
مشکریم ـ زریخانیمین اری، شاهچی ایدی. اکرم قورخوردی تؤکولسونلر ائوه.
نورالدین گلنده سربازلار خیاواندا نفربرلرین دالیسیندا توفنگلرینین لولهسینه
گول قویموشدولار. زریخانیمگیلدن گئتدیق پادیگانا. دؤرتطبقه قیرمیزیکرپیش
ساختمانلار ایدی.
نورالدین بیر آبی پئیکان آلمیشدی هاواخ
ساتدیق نهباشینا گلدی یادیما گلمیر. من دالی صندلده اوتوموشدوم. پادیگانین یولی
یادیمدا. یاغیش یاغیردی. نورالدین ویردی شؤشهسیلهنلر ایشلهدی.
منی یازدیرمیشدیلار مرند ده
کودکیستانا سئرویسی وار ایدی. بیرگون گئتدیم صاباحیسیندان نئینهدیلر گئتمهدیم.
تخته پنجرهلری واریدی آبی رنگلهمیشدیلر. کیلاسین وسطینده میجسمهتکین صندلده
اوتوموشدوم الایاغیم بومبوز ایدی قولاخلاریم فوشقا چالیردی. هله گؤزومه تار گلیر
صحنهلری.
اکرم، طرلانین اوشاغی اولماسینا، حضرت
روقیه نذیری دئمیشدی تبریزدن هاممی گلمیشدی. آهو، اکرمین خالاسی، یئکه قازاندا
ساختیمانین دالیسیندا شاشیله پیشیریردی. اکرمینن گئتمیشدیق مرندین اوستاؤرتولو
بازاریندان قوجا بیر کیشیدن کیریش آلمیشدیق عاباس منه بردووان دوزلدیردی.
بیر آغ چرخیم وار ایدی هئشکسه
وئرمزدیم. نمهاواخ نازلینن یحیا مینمیشدیلر اوزاقدان گؤردوم نهقدر قاچدیم
توتانمادیم. شهنازین تازا بیر اوشاغی اولموشدی آدی سالار ایدی. قیشقیردیم منده
گئدیرم اوشاغیزی ویرام. نم هاواخ ساخلادیلار قاچدیلار دالیمجان.
نورالدین سردشتده ایدی. اصغر آقا بانهده.
گئجهلر گئدیردیق بطولخانیمگیلده یاتیردیق. بطولخانیم اصغر آقانین ارتئشی خنجرین
گئجهلر قویوردی بالیشینین آلتینا. داوود نئچهدانا تختهنی بیر بیرینه میخلامیشدی
موسلسل دوزلتمیشدی چایقاشیقین کئشینن باغلامیشدی فیرلادیردی اؤتوروردی دهییردی
تختهیه رگبار سسی وئریردی. اوشاقلار چیخمیشدیلار قوملارین اوستونه قیشقیریردیلار...
ـ هاوا سویوخدی... صدام تویوخدی.
نورالدین جیبههدن منه ارتئشی ماشین
گتیرمیشدی دالیسیندا آلتیدانا آغسرباز اوتوموشدی. سربازلار تاخیلیردی چیخیردی.
اصغرآقا داوودا قره تانک گتیرمیشدی اؤزون چیرپیردی اویان بویانا. شیوایادا ایکیدانا
یاپیشیقلی قولچاق. بیغم اوتوموشدولار پیانو چالیردیلار.
گئجهلر خاموشی ایدی. پردهلری میخلامیشدیق
دووارا ایشیق ائشیکه چیخماسین. ایلدیریم گلدی بیزی آپاردی تبریزه عاباسقولی حیطینه...
13
بیر قوجا اپریمیش آرواد اوتوموشدی
حیطده حو,ضون قیراغیندا فرش قئیچیسینن دیرناخلارین توتوردی. اکرم گئتدی یخینه
سلام وئردی...
ـ مامان بو کیمدی؟
ـ تامارا دی.
آت طبقه، قرانلیق بیر آشپازخانا ایدی.
ایکیقاپیلی آردل اجاقـگاز وار ایدی. قاباغیندا بیر بوتان کپسول، بیر بئشلیق
روغنـنباتی قوطوسی، اوستونده قوش عکسی وار ایدی. دوواردان نئچه دانا توربا
آسلانیردی بیرینده ناعنع وار ایدی بیرینده اوزرلیک بیرین ده دویی اونی. یئره
خرپیشته کاشیلار دوزموشدولر. گوشهده یئکه قرلمیش قازان، بیر میس خکنداز،
قاباغیندا بالا سوپورگه مرمری وار ایدی.
ناردرن هله مدرسهده ایدی. سلطنت گوللی
دون گئیمیشدی. منی باسدی باغرینا. هله اییی یادیمدادی. اوشگوشه پیلله لردن
چیخدیق یئتیشدیق بالاجا آستانیا. سقفدن نئچه دانا یئکه توراتان آسلانیردی بیزی
گؤردولر گیردیلر دووارین چاتداغینا. ساق الده الچاق خلقهلی قاپی وار ایدی...
ـ مامان بورا هارادی؟
ـ صاندیخانادی.
سول الده فیلیپس یخچل وار ایدی. وسط ده
تخته قاپی ایدی آچیلیردی بالا بیر اوتاقا هئریس فرشی سالمیشدیلار. طاقچادا
تیلویزیون یئکهلیقدا بیر رادیو وار ایدی نصیرین ایدی. یومولدوم اوستونه اکرم دالیدان
توتدی. اوتاقین پنجرهسی باخیردی حیطه. اوش دانا تخته نردهسی وار ایدی. ساق ال
دوواردا بیر قاپی وار ایدی بیر پیلله چیخیردی یئتیشیردی سویوق اوتاقا. سویوق اوتاقین
دوواریندا بیر کئچل چاتماقاش کیشینین عکسی وار ایدی...
ـ مامان بو کیمدی؟
ـ عاباسقولودی.
طاقچادا ایکیدانا لاله چیراغ
بیردانادا گوموش سموار وار ایدی. دووارلار سوواق ایدی اوستونه آغ گژ چکمیشدیلر.
طاقچانین گژلری چاتدامیشدی. سقفه یئکهیئکه دیرکلر آتمیشدیلار آرالارینا بالابالا
تختهلر دوزموشدولر. آتمیشلیق بیر لامپ اوزون سیمینن آسلانیردی سیسقا سیسقا
یانیردی.
حیطین وسطینده حو,ض وار ایدی ایکیالینده
یئکه کردی. بو ال کردیده قیزیلگول وار ایدی او ال کردی ده گؤی اکمیشدیلر. بیرگون
دمپایهنن ویرمیشدیم قیزیلگول کردیسینده ایرمیدانا آری اولدوموشدوم. حو,ضون
یانیندا سو قویوسی وار ایدی بیردانا دا ایشدن دوشموش تولومبا. قویونون داشی سینمیشدی
ترپشردی من اوستونده دومبالان پیستان اوچاردیم.
موستراح، حیطین او باشیندا ایدی قاباغیندا
ایکی دانا الچه آغاجی واریدی تورش ایدی من یئینمزدیم نازلینن یحیا گلنده دوز
سپردیلر یئیردیلر. موستراحین بو الی میطباخ ایدی دولی ایدی تخته طباخینان.
دووارلاری قپقره ایدی. میطباخین بو الی اکبرآجان دام داشی ایدی.
اکبرآجان عاباسقولونون قردش ایدی.
اللی آتمیش ایل قاباق آرواد اوشاغین گوتورموشدی گئتمیشدی تهرانا. اکرم دئیردی
ایندی پوللوموللو مودلو پوزلودولار. دای بیزی سایمازلار. بیر اوغلی رهیس قطاردی.
آلبومدا عکسلری وار ایدی. اؤزلری ژیگولمیگول خوتشالوارلی کراواتلی، آروادلاری
قیزلاری باشآچیق ایدی.
تامارانین ائوینین قاباغیندا بیردانا
بمبل آلماسی وار ایدی تورشلوغدان یئماق اولمازدی بیردانادا اوجا آشیق آلماسی،
یئتیشمهمیش قورت دوشردی ایدی. نئچهدانادا قلمه. گئجهلر یئل ویراردی یپراخلاری
خیشیلداردی. سلطنت دئیردی دئنه...
ـ قلمه قلمهلنمه قلمهلنسن قلمهلهنهجاغام...
من دئینمزدیم سلطنت گولردی قیزیل دیشلری
گؤرسه نردی.
حیطین دؤرهسینه بالابالا داشلار
دوزموشدولر. قیزیلگول کردیسینده بیر آغتوت آغاجی وار ایدی یئتیشردی تؤکولردی
داشلارین اوستونه آغ سوماخبالان دا یوواردیم یئیردیم. حو,ضون قیراغیندا اهیری
گیلانار آغاجی وار ایدی یئتیشمهمیش قورتولاردی.
بو ال همسایامیز مشکریمعمیگیل ایدی.
گوجا باش اشاغی بیر کیشی ایدی. قره عراقچین قویاردی. یئرده چورک گؤرسه ایدی
گوتورردی اؤپردی قویاردی دووار دیبینه یولدانگئچن ایاخلاماسین. او ال همسایامیز
امیرزاداخانیمگیل ایدی. قاپلاری خدجهستان عمقیزیگیلین دربندلریندن ایدی. حیطلری
بیزیم حیطدن اوجادا ایدی. تیلفونلاری وار ایدی. نورالدین زنگ ویراندا امیرزادا
خانیم دوواردان سسلردی گئدردیق دانیشاردیق.
14
خانیم معلیمین انگی اوزون ایدی...
ـ دونن نیه گلمهمیشدین؟
ـ بابام زنگ ویراجاغ ایدی.
ایکیدانا خطکشینن چالدی قیچیمدان
هله ایندیده یئری اینجیییری. اکرمه دئمهدیم. اوتاناردیم اکرم مدرسهیه گلنده.
هاشیمی مدرسهسی، کلنتر ائویندن داشینمیشدی گلمیشدی هلهلیقدا آراکوچهده
قایمقام مدرسهسینه. گوشا قبریستان قالمیشدی مدرسهنین آلتیندا. گولمورادینان
گولاحمدین قبری اوردا ایدی چیخاتمیشدیلار یازیقلاری آپارمیشدیلار قومدا شاهابراهیمدا
قویلامیشدیلار. طرلان دئیر...
ـ گولموراد جومعه غوسلی ائلهردی
قبیرین آشدیق هله سققلی چورومهمیشدی.
گولموراد باغا باخاردی. الچاق حنا
سققللی بیر کیشی ایدی. بیر اوغلی بیر قیزی وار ایدی... اسدینن فرخونده. فرخونده
سلطنتین ننهسی ایدی.
قایمقام قیز مدرسهسی ایدی دالیسی
هونریستان ایدی یئکهیئکه اوغلانلار اوزون خطکشلر یئکه دفترلرینن گلردیلر.
اوّل گون اکرمینن گئتدیم صاباحیسیندان اؤزوم گئتدیم. سحرلر هونریستاندا صفه
دوراردیق کوچهدن صفینن گلردیق قایمقاما. قیزلار حیطده کدو کدو این ور کدو آن ور
کدو وسط کدو دور کدو اویناردیلار بیزده باخاردیق.
اوّل گون بیر خوشاخلاق عینکلی آقا
گلدی سوروشدی شؤشهلر نه رنگ دی دئدیق ساری. گولدی دئدی مدرسهده گرک فارسیسین دئیاخ.
اکرم ناهارچاغی سوروشدی نمنه اورگشدین دئدیم زرد. اوندان قاباق زرد قولاغیما
دیمهمیشدی. ایکینجی گوندن بیر خانیم معلیم گلدی هیسلی ایدی من ائله قورخاردیم
هر زاد یادیمدان چیخاردی آللاهین او... موش گربه را دنبال می کند...ینده دئینمزدیم.
گونده میدادسیلهنیم ایتردی اکرم
ساواشاردی. کیتابین اوّل صفحهسینده او دوز خطلری خطکشیننده چکردیم اولمازدی.
اوقدر سیلردیم کاغاذ جیریلاردی. هر زاددان چوخ آهو ـ کاهو ـ پارو ـ جارودان
خوشوم گلردی. سارا انار داردی باشارمازدیم بیرگون گئجه آمما یوخودا دورموشدوم
ازبردن اوخوموشدوم.
بوینوم اوزون ایدی اوشاقلار زرافه
سسلردی. موبصوروموز چوبان ایدی هله باشارمازدی شولوخلارین آدینی یازسین.
یاپیشاردی قولوموزدان سورویردی گتیرردی تختهـسیاهین قاباغینا. یاپیشاردیق صندللردن
اوشاقلارین کوینکلریندن آپارانماسین. گئدنده او بیریسین گتیرسین قاچاردیق
اوتوراردیق یئریمیزده.
دالی ردیفده بیر اوغلان وار ایدی آدی
خوشگواره ایدی زیرتنبل ایدی. یاپیشاردی توکلریمدن چکردی خانیم معلیم هئشزاد
دئمزدی.
اکرم واکسنکارتیمی تاپانمادی دئدی
قالیب ساققیزدا مریواندا. خانیم بئهداش نئینهدی قولوم اوسته گئتمه دی. اکرم اؤزو
اوشوین ایدی منهده بئشدس پالتار گئیدیرمیشدی. کوینکلریم باشیمدان چیخمیردی
اوشاقلار گولوردی.
آخشاملار اکرم تورکی اخبارینا باخاردی.
جنگی گؤرسهدنده دئیردی...
ـ باخ گؤر باباوی گؤروسن.
ایلدیریم تله قورموشدی سیچانلاری
توتسون. سیچان صاندیخانادا پاکاتی دلمیشدی اوش کیلو دویونی یئمیشدی.
اکرم اوتوموشدی حیطده حو,ضون
قیراغیندا میس تشتده پالتار یوسون بئلی سپمیشدی دای دورانمامیشدی صفوره ـهمسایانین
آروادیـ گلمیشدی بئلینه کوپه سالیردی ساعات آخشام بئش ایدی تیلویزیون پینوکیونو
وئریردی صفوره دانیشدیخجان من تیلویزیونون سسین اوجالدیردیم. صفوره دئدی آی بالا
بو اوشاق نیهبس بئله ائلیییر.
اکرم ایکی تومن پول وئرردی مدرسه نین
قاباغیندا بوتقادان اون بئش قیرانا اهری آلاردیم. هله پول لارین اوستونده شاهین
عکسی واریدی. بوتقاچیکیشی صفوره نین اری ایدی.
صفوره گونده گلردی جهرهخانادا
تامارانان جهره اهییرردی سودانگلنسورمهلیقیز لاری اوخویاردی.
اکرمینن ساواشاندا دئیردی بابان گلسه
دئیهجاغام. ناردرن چایداندا داغ سو قویاردی کردینین قیراغیندا باشین یوواردی.
ایکیدانا هوروکی وار ایدی دوشموشدی بئلینهجن. قاری کورپوسونده فاطیمیه مدرسهسینه
گئدردی. بیرگون منیده آپارمیشدی. قیزلار ییغیشمیشدی دؤرهمه هرهسی بیر سؤز دئییردی
گولوردی. قئییدنده خطـواحد تورموز توتدی سرلندیم یئره. ناردرن تاپیشیردی
اکرمه دئمه یم.
نصیرین ایکیدانا اینکی وار ایدی گوهر
سوتون ساغاردی نصیر گتیرردی عاباسقولوگیله. سلطنت لؤح کاسادا قئینهدردی تؤکردی
بالاجا ایستکانلارا. ایلدیریم قندی آتاردی گؤیده فیرلاناردی آغزین آچاردی دوشردی
آغزینا ناردرن ساواشاردی. سلطنت نئینهردی من سوت ایشمزدیم. یاپیشاردی بیلهییمدن
اکرمه گؤرسهدردی...
ـ بیر دری دی بیر سوموک.
نصیر ایلدیریمی یازدیرمیشدی کیربیت
کرخاناسینا. سحر بئشده گئدردی. سلطنت ساعاتی قویموشدی یخچلین اوستونه منیم الیم
یئتیشمهسین. قورخاردی خراب اولا ایلدیریم یوخویا قالا.
بیرگون شهناز گلمیشدی اکرم آبغورا آشی
پیشیرمیشدی حیطده نازلینن یحیا کردینی قازمیشدیلار شئهقوردولاری
چیخاردیردیلار تؤکوردولر قابلامایا. سلطنت گلدی دئدی نئینیسیز یحیا دئدی کومپوت
دوزلدیریق.
15
حیطین دیبینده قرانلیق بیر آمبار وار
ایدی. آدام نان سورا هر زاد تاپیلاردی. ایلدیریمین مدرسه کیتابلاری اوردا ایدی.
کیتابلارین اوّلینده شاه فرحین عکسی وار ایدی. هله جیرمامیشدیلار. آمبارین دیبینده
بیر قاپی وار ایدی قیفیللی ایدی یحیا تپیکینن ویردی آچیلدی...
یئکه بیر حیط ایدی دؤرهسی بالا بالا
اوتاقلار ایدی اوتاقلارین بیرینده یئکه بیر جنگیتوپ وار ایدی بیر تهیهری
چیخمیشدی دوشموشدی آزجا او الده یئره.
یحیا توپون ایپینی چکدی توپ آت کیمین
کیشنهدی باجالاریندان توستو چیخدی یئر گوی قاریشدی کروانسارانین قاپلاری آچیلدی
نئچهدانا آتلی گیردی ایچری طولهلردن آت ائششکلر چیخدی آرا قاریشدی مصصب ایتدی.
بیر سققللی کیشی اوتوموشدی اوتاقلارین
قاباغیندا سککیده تیلته یئییردی بوغلاری گیرمیشدی آغزینا. او تای سککیده بیر
ایپ بورکلی کیشی اوتوموشدی ساز چالیردی اوروسلارین بیری اوینوردی. یحیا دئدی ایپبورکلی
کیشینین عکسی بیزیم آلبومدا واردی. آداشین دده سی دی. چیراغعلینین ددهسینه،
آداش دئیردیلر. نازلی دئدی بوردا هله نئچهایل قاباقدی. یحیی دئدی گیرمیشیق
تونئلـزمانا. منیم آغزیم ائله آچیق قالمیشدی.
کتدیلر بال کرهدن یومورتادان
گتیرمیشدیلر کروانسارانین حیطینده ساتماغا. بیر قوجاکیشی هشترخان ساتیردی آلتیسی
دؤرت شاهی. یحیا ایکی قیران وئردی قوجاکیشی باخدی باشتاپمادی. نازلینین بیر
میدالی وار ایدی اونشاهیدانایدی بیری قوپموشدی جیبیندهایدی گؤرستدی
قوجاکیشی آلدی باخدی کسیرینه بیرعاباسی ایکیشاهی وئردی.
هشترخانلارینان گلدیخ عاباسقولوگیله
سلطنت دئدی آیبالا بولار هاردا ایدی یحیا دئدی کروانسارادان آلدیق سلطنت قاققیلدادی
اینانمادی دئدیبس همسایانیندی گلیبلر. هشترخانلاری اوتوردوخ تویوقلارین
یوواسینا گئجه سحره جن قورولدادیلار.
نصیر یاتانمامیشدی. صاباح سحر دوردی
هشترخانلارین بئشی ائرککی ایدی کردینین قیراغیندا کسدی اوچون وئردی سلطنته ایکیسینده
آپاردی گوهره. بیری دیشی ایدی کسمهدی دئدی اتی بئواخ پیشر. یحیا آدین قویموشدی
مگاپوت. مگاپوت نصیر گلن ده قورخوسوندان قورولدامازدی.
سلطنتگیل داشیندی گئتدی بوروخبوروخ
دربنده. گئجهلر یحیانان نازلی گلیردی قورخمیاخ. بیرگون یحیی توت آغاجینین آلتین
قازمیشدی بیردانا سینیخ برنی تاپمیشدی دولو ایدی گوموشپولونان..
نازلی دئدی اوستون اؤرتاق قالسین روز
ـ مبادیه. روز ـ مبادانی رابین هود دا سیچاندان اؤرگشمیشدی. جومعهلر تبریز شبکهسی
اوقدر رابینهود
وئرمیشدی حیفظ اولموشدوق. پدرـتاک قارنینن داروغهنی سالدی کلیسادان ائشیکه... از
کلیسای من برو بیرون.
صاباحیسی گوموش پوللارین بیرین
آپاردیق کروانسارادا وئردیق اوشدانا گئچی آلدیق اکرم سوروشدی بولار هاردا ایدی
یحیا دئدی کروانسارادان آلدیق اینانمادی دئدی بس شهناز وئریب.
گئچیلرین بیری قره ایدی بیری آغ بیریده
بوز ایدی یحیا آدین بوزقولاخ قویموشدی اورگتمیشدی قاپی دووولنده گئدیردی قاپینی
آغزینن آچیردی. نورالدیندن نامه گلمیشدی بوزقولاخ پوستچودان آلمیشدی گتیرمیشدی
اکرمه. یازمیشدی تیکابدان وئریبلر سردشته سو یوخدی قاری اریدیرلر دستماز
آلیرلار.
16
دستمالچیباغی ائوهدانلیق اولموشدی
او باشیندا بیر مدرسه دوزلتمیشدیلر هله دوواری یوخودی داشیندیق گئتدیق اورا.
سحرلر قورخومدان بیرساعات تئز گئدردیم. اکرم ساعاتی بیر ساعات دالییه چکردی من
بیلمزدیم.
بیر گون ائله تئز یئتیشمیشدیم کی ائله
بیر قارقالار وار ایدی. یاریم ساعات سورا اوشاقلارین بیری اوزاقدان تاپیلدی
بورکون چکمیشدی اوزونه باجاسیندان باخیردی اللری جیبینده ایدی کیتابلارین کئشینن
باغلامیشدی ویرمیشدی قولتوغونا. بالابالا او بیریسیلرده گلدی مدرسهنین باباسی
زنگی ویردی. هاوا ائله شخته ایدی کی حیطده صفه دورانمادیق گئتدیق سالوندا مرگـبر
ـآغزیمیزا گلنی دئدیق.
بئواختا قالانلار حیطده اللرین
قویاردیلار قارین آلتینا قیزاراردی بیر بیر توتاردیلار ناظیم شیلانکینان ویراردی.
گلردیلر کیلاسا خانیم یوسیفی باخاردی ناظیمی قارقیش ائلردی. بیرگون ناظیم
اوشاقلارین بیرین ائله ویرمیشدی کی کیلاسدا عزای ـ عمومی اولدی دای خانیم یوسیفی
درس وئرنمه دی.
خانیم یوسیفی هئشکسه ساواشمازدی. بیر
گون مغنهسین چیخاتمیشدی باشی ساری ایدی تؤکلوموشدی کورکینه تاپیشیرمیشدی ناظیم
گلسه دئیاخ. اوشاقلارین بیری پینجین ایاغین چوخاتمیشدی قیزارمیشدی آز قالیردی
پاتداسین باشیندان الوو چیخیردی. نورالدین جیبهه دن منه کامپیوتری ساعات گتیمیشدی.
ده یقه باشی اوشاقلار سوروشوردولار نه قدر قالیر زنگ ویرا. چوخی کاسیب اوشاغی
ایدی. دؤرهبر کتلردن تازا گلمیشدیلر. آیلارینان حاماما گئتمزدیلر عجیب غریب اییلر
وئرردیلر. کوهنه یاماخلی پالتار، جیریخ رنگبهرنگ پیلاستیک چکمهلر گئیردیلر.
قاردا جورابلاری جیمجیلاق اولاردی. پوللاری اولمازدی خط ـ واحیده مینسینلر
پیادا گلردیلر.
نه قدر اکرم پنیر چورک وئرسه ایدی
آپارمازدیم هله قالسین میوه. اوتاناردیم. ائله باخاردیلار کی...
ـ یولداش منه ده وئردا...
قالاردیم هانچی سینا وئریم. یادیما
دوشنده هله ده وارلیقیمدان اوتانیرام.
نورالدین عکس یوللامیشدی سنگرلرین ده
اتوموشدی سربازلارینان تاوادا چورکینن چرخکرده یئرآلما یئییردی. خومپاره
دوشموشدی سنگرلرینه پاتدامامیشدی نذیر دئمیشدی قره گئچی نی کسدیق همسایالارا
پایلادیق.
17
نئچه هفته ایدی گئتمیشدیق حمزهعلی
گیلده قالیردیق. زیور ـحمزهعلی نین سونکی آروادیـ گئتمیشدی ایصفاهان دا قیزیگیله،
مقصود دا نارینجی بیر ماک تیرئلی آلمیشدی بندرعاباسا یوک آپارمیشدی.
حمزهعلی دستمالچی باغینا باخاردی. گؤیگؤز
بیر کیشی ایدی. قلبی نوخوش ایدی. تختی ائوین گوشهسینده ایدی. موستراحا گئدنده من
قاچاردیم تختینده یاتاردیم زیور ساواشاردی. بو اوتاق قدیم میطباخ ایدی ایکیتایلی
قاپیسی وار ایدی آچیلاردی تنبییه...
گولدسته نوخوشلویاندا حمزهعلی تنبینی
ساتمیشدی سون سوز بیر ار آروادا. بیر گون شهناز گلمیشدی ناهارا اکرم دولما
دولدورموشدی نم هاواخ یحیا ایکیتایلی قاپینی ایتهلدی آچیلدی بیزده
دالیسیجان...
مهربان بیر قادین اوتوموشدی تنبی ده
جهره اهییریردی دوردی ایشکابدان نوخود کیشمیش گتدی هرهمیزه بیر اوغوش وئردی.
تنبی آچیلیردی بالا بیر دهلیزه...
بو دهلیزده گولدسته شورچومنین اوشاقلارینا
قوران درسی وئرردی. سلطنت دئیر کی...
ـ او زامان باغمئشهده اوشدانا قیز مدرسهیه
گئتمیشدی بیریده گولدسته ایدی.
آهو گولدسته نین بالا باجیسی
دئیرکی...
ـ گولدسته مدرسهیه گئدنده ابوالقاسم
دوشموشدی دالیسیجان گولدسته آخشام ائوده دئمیشدی دایمن صاباحدان مدرسهیه گئتمیرم
نهقدر اسد سوروشموشدی نیه، دئمهمیشدی.
طرلان گولدستهنین یئکه قیزی دئیرکی...
ـ گولدسته مدرسهیه گئدنده الجکایاخلیق
گییردی نامحرم گؤرمه سین. اکرم دئیرکی...
ـ گولدسته دوگی دملی ینده عطری
شورچومنین آغزیناجان گئدردی.
شهناز دییرکی...
ـ گولدسته چورکین آرا گولون وئرردی من
یئیردیم.
دهلیزین بالا بیر قاپیسی وار ایدی
آچیلیردی دالی حیطه...
حیطین وسطی یئکه بیر جولا ایدی زیل
تؤکموشدولر. حیطین او باشی دامداش ایدی. بیر قوجاکیشی اوتوموشدی پنجرهنین
قیراغیندا چوبوق چکیردی. آنلی قیریش سققلی آغارمیشدی. آغ باش بیر قادین ایچریده
اوتوموشدی لپه آریدیردی. قرهشین بیر اوغلان دا سوتو تؤکوردی ماشینا فیرلادیردی
بیر نوغدانین دان سوت بیر نوغدانین دان خاما گلیردی.
آغباش قادین بیر یول گلمیشدی حمزهعلیگیله
اکرم ایاخ دیرناخلارین توتسون...
ـ مامان بو کیمدی؟
ـ آیپارا دی.
چوپوق چکن قوجاکیشی نین عکسینی، حمزهعلی
گیلده دووارا ویرمیشدیلار. قوجاغیندا بیر قره شین اوشاق وار ایدی...
ـ مامان بو کیمدی؟
ـ گولاحمد دی.
ـ اوشاق کیمدی؟
ـ ایبرامقولودی.
گولاحمد، حمزهعلی نین دده سی ایدی.
حمزهعلی نین ننهسینین آدی حلمه ایدی. ایلات ایدی. جورابلارین چکردی دیزلرینه
گئدردی طولهده جامیشلاری ساغاردی.
گولاحمد گئتمیشدی سیاوندا آشیق اصغرین
ننهسین صیغه ائلهمیشدی حلمه ائشیتمیشدی دیغلامیشدی اولموشدی گولاحمد گئتمیشدی
ونیار دان آی پارانی آلمیشدی. آی پارا، ایبرامقولونون عمه سی ایدی. الین آغدان قره
یه ویرمازدی.
گولاحمد مالا باخاردی. اینکچی ایدی. یئکهیئکه
جامیشلاری وار ایدی. سوتلرین قئیماخ لارین یوغوتلارین پنیرلرین کره لرین ساتاردی.
داملایندا یاپبا یاپاردیلار. یاپبالاری تندیرده یاندیراردیلار چورک پیشیرردیلر.
همسایالار گلردی تندیرده بیت بیره لرین سیلکردی.
گولاحمد ایسکندرین اوغلو ایدی.
ایسکندر کیمین اوغلو ایدی هاردان گلمیشدی بیلمیرم. اکرم ده بیلمیر. آهو دان دا
سوروشدوم بیلمهدی. ایسکندرین ائوی باغمیشهده آراکوچه ده ایدی. سیاوانا یئتیشمهمیش
اوست الده. ایکی اوغلو وار ایدی... گولمورادینان گولاحمد.
گولموراد اونبئش یاش گولاحمد دن
بؤیوک ایدی. اؤگئیچیلیقلاری وار ایدی. دده بیر ننه آیری دیلر. گولاحمد
قاپلارینا بیر یئکه ایت باغلامیشدی هئشکس یاخینا گئدنمزدی. ایسکندردن سورا حیطی
ساتمیشدیلار. گولموراد گئتمیشدی کلنتر محله سینده ائو توتموشدی. گولاحمد ده
گلمیشدی بو ائوی آلمیشدی.
18
ائو دولبوشال ایدی. تهرک چالیردیلار
بوشقابدا دوزوردولر پنجره ایچینه. جومعه آخشاملاری شامادا قالیردیلار. نازلی دئدی
حمزهعلی نی هواپیمانان آپاریب لار آمریکایا من ده ایناندیم. زیورین سهمین وئردیلر
گئتدی. هاشیم گلدی اوس طبقه نین دووارلارین گوتدولر کاغذ دیواری ائله دیلر. حمزهعلی
نین تختین قویدولار حیط ده موولرین آلتینا. نئچه واخ سورا مقصود ائولندی بیزده
گلدیق شهنازگیله...
چیراغعلی ـشهنازین اریـ ضیدـاینقیلاب
ایدی مچیدین سسی گلنده یئر گویه یامان دئیردی. گوشی تاخاردی اذانین سسین ائشیتمهسین.
عاباس دای مدرسهیه گئتمیردی...
ـ قوران درس وئرنده باشیم آغریییر. من
بو کیتابلاردان چوخ بیلیرم.
توکان دا ایشلردی. پارچا گلردی
اوتولردیلر. دمیر قره تابلودا فینیشـبوخار یازمیشدیلار.
نازلی دخترعمویمنراشل رومانین
اوخوردی. یحیی حیطخلوتده بالیخلارا ویتامین تؤکوردی. سریه سماور میزینین
یانیندا آغ دری نین اوستونده قیرمیزی گوللی بالینجا دایانمیشدی خورولدوردی. شهناز
سالاری سالمیشدی قیچی اوسته یئکه مئژمئیی ده نوخود آریدیردی. من اوزوقویلی توشموشدوم
دفتریمین اوستونه نارین نارین خط لریمی یازیردیم. اکرمین گؤزلری نیگران ایدی. نئچه
آی ایدی نورالدین دن نامه گلمهمیشدی.
بیرگون مدرسه ده اوشاقلارین بیری نن
ساواشدیم دئدی باباوی اسیر توتوبلار منده باشلادیم ظولوم ظولوم آغلادیم. مودور
گلدی باشیم اوسته بیلدی اوغلانی چاغیردی دویونجان ویردی. اکرمه هئش زاد دئمه دیم.
نئچه هفته سورا مچید دن بیر نفر
گلمیشدی دئمیشدی نورالدین مفقود اولوب. شهنازین رنگی آغ آبباغ اولموشدی. منه
بیلیندیرمه دیلر. خانیم یوسیفی گئتمیشدی عاباسقولوگیله حمزهعلیگیله
تاپانمامیشدی گلمیشدی شهنازگیله. من قاچدیم گیزلندیم. اکرم نئچه آی دانیشمادی
ائله میجسمه کیمین باخیردی. تصویری وار ایدی سسی یوخ ایدی. عابباس آپارمیشدی رازی
یه بیر نایلون اعصاب داواسی وئرمیشدی. نوخوشلارین بیری عاباسا دئمیشدی سن ده دلی
سن؟ عابباس دا دئمیشدی هن.
گئجه لر اکرم گئدردی اوتوراردی دام
یولودا آغلاردی. دام یولونون آلتی سریه نین خوماسی ایدی. هرزادی اوردا گیزله دردی.
اوردا اولماغینا قت چای قویموشدی. سریه ناماز قیلاندا عاباس موهورون گوتورردی
قاچاردی. زیغدان تسبئحی وار ایدی قیریلمیشدی جنمازی آچاندا تؤکولردی.
عاباس چایی ایچردی ایستکانی تونازلاردی
ائوین وسطینه سریه ساواشاردی. سریه نین پیلاسیتک میلچک اؤلدورهنی وار ایدی دستهسینن
کورهکین قاشییردی. عاباس باپیشاردی سریهنین توشکیندن سورویردی ائوین بو
باشینا. یحیی چیراغعلینین فندکینین گازین چوخاتمیشدی چیراغعلی سیگار یاندیراندا
بوغلاری یانمیشدی یحیی قاچیب زئرزمیده گیزلنمیشدی. غولامحسن زئرزمیده منگنه
ویراردی.
جومعهلر گئدردیق عینالی مچیدینه،
سؤیوتلوغا، دنده. من یورولاردیم مینردیم هاشیمین بوینونا. هاشیم کهیکاوتی درردی
اوتدا چای قویاردی ایچردیق. پیلدسته اویناردیق. چیخاردیق داشلارین اوستونه یحیی
عکسیمیزی سالاردی.
هاشیمین ائوی توکانی کوچهنین او تاییندا
ایدی. گونده هشتاد جوت باشماخ تیکردی. آخشاملار جمالی یوللاردی گئدردی طاقیانیندان
قنادی شیرنیسی آلاردی. دام یوللارینین دوققوز دانا پیللهسی وار ایدی جمال باش
پیللهدن آپبیلاردی میترا یئتدینجی پیللهدن منده قورخاقورخا اوچونجی پیلله
دن. آشپازخانالاری زئرزمیده ایدی. ائوی چووورردیق باشیمیزا فیریشته هئشزاد
دئمزدی. شهریارین بیر حیدربابا کیتابی وار ایدی من میلچکلری قویاردیم وسطینه
پوکردیم اؤلردیلر. جمال پنکهنی پوفلردی هواپیما سسی چیخاردی.
19
تامارا هاواخ اؤلدی عاباسقولو حیطینی
هاواخ ساتدیق یادیما گلمیر. ائلهبیل هامیسی یوخو ایدی. مگاپوت قالدی او یوخودا.
بوزقولاخ دا. مقصودون بیر اوغلی اولموشدی آدین قویموشدولار مجید. دالیحیطی
هاواخ ساتدیلار گولاحمد هاواخ اؤلدی بیلمیرم. داریخاندا گئدردیم سلطنتگیله...
ایلدیریم حیطدن بامادور درردی دوز
سپردی وئرردی من یئیردیم. نصیر اینکلری ساتمیشدی طولهنی آشپازخانا ائلهمیشدیلر.
بیر دانادا بالاجا حامام چیخاتمیشدیلار سککی ده یئکه آغ بیر ارج گرمکون قویموشدولار.
موستراح ایکی پیلله حیطدن اوجادا
ایدی آفتاهانان سو تؤکنده آزجا سورا سووون شیریلتیسی گلردی گئدردی تؤکولردی
قویویا. قویو دولاندا نصیر دولچانان بوشالداردی کردیلره.
بیر گون قاچدیم موستراحا قاپینی آچدیم
گؤردوم گوهر ـسلطنتین گونوسیـ اوتوروبدی. باشینا حنا قویموشدی گولدی کئفیمی
سوروشدی قاپینی چیپدیم قاچدیم نئچهگون گیزلهنردیم گؤرمهسین.
سلطنتگیل گوهره آرواد دئیردیلر. آرواد اشاغیدا اوتوراردی سلطنتگیل اوسته. ناردرنینن
اسمـشوهرت اویناردیم. بیرگون صاندیخانادان بیردانا حافیظ دیوانی تاپدیم نورالدین
آدین قیرمیز میدادینان اوستونده یازمیشدی ناردرنه گؤرستدیم گئتدی او بیری
اوتاقدا آغلادی.
نصیر چای قیراغیندا باغ آلمیشدی سلهده
گیلانار گتیرردی سلطنت ائیواندا یئکه میس تشتده لاواشا قویاردی. سلطنت آبغورا
شؤشهلرین دوزموشدی پنجره ایچینه گون ویرسین قیزارسین.
ایلدیریمین ایریمیسگگیز قره چرخی وار
ایدی من ایاغیمی آلتدان سالاردیم سورردیم. چرخی ساتدی قیرمیزی بیر سوزوکی هشتاد آلمیشدی
گونده سیلردی.
سیناما بیلیطی اوش تومن ایدی. تبریزین
آلتیدانا سیناماسی وار ایدی هامیسیدا شهنازدا ایدی. آراکوچهده مینردیق یوز اون
دوققوز خططینه بازار آغزیندا توشردیق پیادا شیخصفیدن گئدردیق شهنازا.
ایلدیریم چیپسیدن پیستیقدان آلاردی یئیردیخ. بیرگون هئشزاد تاپمادیق گئتدیق مخملبافین
دستفروش فیلمینه. ایلدیریم چیپسین نایلونون آرادان یاپیشاردی من قرانلیقدا دئیردیم
بس قورتولوبدی. پینگپونگادا گئدردیق. ایلدیریم کرخانالاریندا اوّل اولموشدی منده
والیبالکیمی اویناردیم.
اکرم ایکیایل قره گئیدی. بوغسققلی
چیخمیشدی قاشلاری دوـبانده اولموشدی. سحردن آخشاماجان تورکی فارسینی قاتاردی
اوخویاردی.... تو بستی بار سفر آیریلدین مندن... اوخوماخلاری عوضلردی نورالدینه
قره دئیردی من بیلمهیم... هاممی قویوب گئدندی قره منه قالاندی... نازلی نهقدر
سوروشاردی ناوارلاری هارا قویوب دئمزدی...
ـ هاممیسین عاباسقولوگیلده آپاردیم
تؤکدوم حو,ضون قیراغینداکی قویویا.
20
من سوّم اوخوردوم. گلمیشدیق دستمالچی
حیطینه. گئجهلر یحیا گلردی قورخمیاخ. چارشنبهلر فیلمـسینمایی وئرردی نازلی دا
گلردی. اؤز تیلویزیونلاری برفکلی گؤرسهدردی. نازلینن گئتمیشدیق زئرزمیده
ناوارلاری تاپمیشدیق... می... زده شب... چو ز می... کده باز آیم. ناوارلارین بیرینده
نورالدین ایران ایران رگبار مسلسل هانی اوخوموشدی سربازلار دا الله الله لارین
دئمیشدی... اکرم نمنئینه دی.
حیطده ایکیدانا کردی وار ایدی
بیرینده شلو آغاجی وار ایدی بیرینده صورتی روز. روز کردیسینه اکرم سو,زینن
رئیحان اکمیشدی شلو کردیسینهده جعفریدن شاهیدان توپدان مرزهدن. ایکیدانا
دا دووار دیبینده بالا کردی وار ایدی یحیی گولصاباح توخومی گتیرمیشدی اکمیشدیق.
آشپازخانانین ایکیدانا بالا پنجرهسی
وار ایدی باخیردی شیش مئتری کوچهمیزه. یحیی پنجرهدن باخاندا اکرم ساواشاردیکی
توکلرین اوزوندی همسایالار دئیر بس منم. شلوآغاجی اوقدر گتیرمیشدی کی اکرمینن
بیر دولچا آپاردیق سلطنتگیله بیر دولچا شهنازگیله بیر دولچا دا مقصودگیله.
مقصود تازا چؤلدن یئتیشمیشدی هله اوستو باشی قره ایدی. اکرم حمزهعلینین یئرینی
گؤردی آغلادی.
اکرم گئدیردی نهضته. سوّم چاهاروم
اوخوردی. اینشالاریمیزی وئرردیخ نازلی یازاردی...
به نظر من این جنگ باید ادامه پیدا کند
چون این جنگ را ما شروع نکردیم...
نازلی دیرناخلارینا لاک ویراردی. یحیی
آییننامهـرانندگیکیتابین ازبرلردی. دام سوزوردی اکرمینن من گئتمیشدیق بونیادـشهید
دن تلیس آلاخ. عاباس چیراغعلیدن گیزلین گئتمیشدی جیبههیه. شهنازین قندی اوشیوز
اولموشدی دؤهتور گلیبنکلامید وئرمیشدی.
21
بومب توشموشدی چیراغعلیگیلین شؤشهلری
سینمیشدی. آهو آخشام گلمیشدی کی...
رادیو دئییب شیمیایی سالاجاخ نایلونا
سوغان قویون توتون بورنوزا.
چیراغعلی قهوهای بیر وانتپیکان آلمیشدی
میندیق دالینا گئتدیق پایانیولوندا بویاخانیا. غولامحسنین آروادی آبگوشت قویموشدی.
سالار تیلته کاساسینی چکمیشدی اؤز قاباغینا. شهناز گولوردی کی...
ـ بو اوشاق ائوده آبگوشت دیلینه
ویرماز.
صاباحیسی بویاخانادان گئتدیق ونیارا.
گون باتمیشدی یئتیشدیق. کدخودانین اوغلی گلدی فانیسینان آپاردی ائولرینه. چوخلی
حورمت ائلهدیلر. یئکه بیر مئژمئیی سوت یئکه بیر مئژمئیی چای گتدیلر. دریا دئدی
من همی سوت ایچهجاغام همیده چای. منده توشدوم اکرمین جانینا کی منده همی سوت
ایچیرم همیده چای. صاباحیسی گئتدیق کندین پیرینی غارت ائله دیق. نم نه قدر بیله
زیکدن اوزوکدن ییغیب گتیرمیشدیق. شهنازین آز قالدی باغری چاتداسین کی...
ـ اولار نذیر دی کتدیلر بیلسه باشیزی
کسر تئز آپارین قویون یئرینه.
داغین باشیندا داشلاری دوزموشدولر بیر
بیری نین اوستونه. وسطینده قره پرچم وار ایدی نمنهقدر گؤی پارچا باغلامیشدیلار
میلهسینه. یحیی اوزوکلرین بیرینی یادیگار ساخلادی.
گونلر گئشدی. یحیی سرباز گئتمیشدی
سویوندی. نازلی اره گئتدی. جنگ قورتولدی. اسیرلر گلدی نورالدین آمما گلمهدی.
چیراغعلیگیل داشیندی گئتدی تهرانا.
ایندی کی بونو یازیرام اوتوز ایل او
گونلردن گئچیری. اوتوروب یازسام یوزمین صفحه اولار. الیم گئتمیر یازماغا. خاطیرهلر
ساریمساخ تورشوسو کیمین دی. سونکی خاطیرهلر دای بیلهمه شیرین گلمیر.
1376ینجی شمسی ایلده من تهراندا
پزشکی اوخوردوم بیردانا پیلاک گتیرمیشدیلر ایکیدانا سوموک. دئمیشدیلر
نورالدیندی. اکرم زنگ ویردی گئتدیم تبریزه. ملیکیئرینده بیر داش قویدوق
قویلادیق...
نورالدین دباغ... فرزند عباسقلی...
تاریخ تولد 1325... تاریخ شهادت 1361.
اکرمه دئمهدیم آمما سیز اؤزگهسی
دئییلسیز نورالدین او سوموکلرده دئییل. نورالدین او مرمر داشدا دئییل. نورالدین
منیم قلبیمده دی.
هیچ نظری موجود نیست:
ارسال یک نظر